«Կամովին վայր դնել զենքն ու հանձնվել իշխանություններին». ԱԱԾ-ի կոչը «Սասնա ծռեր» զինված խմբին

474

ՀՀ ոստիկանության պարեկապահակային ծառայության գնդի տարածքում գտնվող «Սասնա ծռեր» խմբավորման անդամներին ՀՀ ազգային անվտանգության ծառայությունը հորդորել է դրսևորել ողջամտություն և կամովին վայր դնել զենքն ու հանձնվել իշխանություններին: ՀՀ ոստիկանության Հասարակայնության հետ կապի և լրատվության վարչության պետ Աշոտ Ահարոնյանը ֆեյսբուքյան իր էջում քիչ առաջ տեղադրել է կոչի բովանդակությունն ամբողջությամբ:

Դրանում մասնավորապես ասվում է.

«2016թ. հուլիսի 17-ից մինչ օրս զինված խմբի կողմից ՀՀ ոստիկանության պարեկապահակային ծառայության գնդի տարածքի զավթման ընթացքում, ըստ այս պահին առկա նախնական տվյալների, կատարվել են առնվազն հետևյալ հանցանքները.

Ø վերցվել են պատանդներ (ՀՀ քրեական օրենսգրքի 218 հոդված),

Ø զավթվել են շենքեր, շինություններ, տրանսպորտի, հաղորդակցության միջոցներ (ՀՀ քրեական օրենսգրքի 219 հոդված),

Ø ապօրինի կերպով ձեռք է բերվել, պահվել, փոխադրվել և կրվել է հրազեն (ՀՀ քրեական օրենսգրքի 235 հոդված)

Այս հանցանքները կատարած անձանց սպասում է մինչև 15 տարի ժամկետով ազատազրկում:

Արդեն իսկ կատարված հանցավոր գործողությունների համար անխուսափելիորեն վրա հասնելիք քրեական պատժի տեսակի և խստության աստիճանի վրա էապես ազդելու են զինված խմբի յուրաքանչյուր անդամի կատարած գործողությունների բնույթը և առաջացրած հետևանքների ծանրությունը:

Միաժամանակ ՀՀ օրենսդրությամբ նախատեսված հիմքերի և պայմանների առկայության դեպքում.

Ø իր պահանջներից հրաժարված և պատանդին կամովին ազատ արձակած անձն ազատվում է քրեական պատասխանատվությունից, եթե նրա գործողություններն այլ հանցակազմ չեն պարունակում,

Ø իր պահանջներից հրաժարված և զավթածը կամովին ազատած անձն ազատվում է քրեական պատասխանատվությունից, եթե նրա գործողություններն այլ հանցակազմ չեն պարունակում,

Ø ապօրինի հրազենը կամովին հանձնած անձն ազատվում է քրեական պատասխանատվությունից, եթե նրա գործողություններն այլ հանցակազմ չեն պարունակում:

Զինված խմբի անդամներին մեկ անգամ ևս հորդորում ենք դրսևորել ողջամտություն և հաշվի առնելով վերոնշյալ հանգանամքները` կամովին վայր դնել զենքն ու հանձնվել իշխանություններին: Դրա համար դուք դեռ ժամանակ ունեք:

Այս առաջարկն ընդունողները պետք կատարեն հետևյալ գործողությունները.

1. դուրս գալ անցագրային կետից,

2. զենքը պահել գլխավերևում և թեքվելով աջ, առաջանալ մոտ 50 մետր,

3. շինանյութի խանութի հարակից տարածքում տեղադրված հովանոցների մոտ վայր դնել բոլոր զենքերը,

4. Ճանապարհի կենտրոնական մասով առանձին-առանձին մոտենալ Ոստիկանության ծառայողներին»:

ppc

ԹՈՂՆԵԼ ՊԱՏԱՍԽԱՆ