«Ռուսաստանը փորձել է խոչընդոտել Մակեդոնիայի և Մոնտենեգրոյի անդամակցությանը ՆԱՏՕ-ին»․Ստոլտենբերգ

214

ՆԱՏՕ-ի գլխավոր քարտուղար Յենս Ստոլտենբերգը հայտարարել է, որ Ռուսաստանը խոչընդոտել է Մակեդոնիայի և Մոնտենեգրոյի անդամակցությանը ՆԱՏՕ-ին, այս մասին գրում է «РИА Новости» գործակալությունը։

«Մենք տեսել ենք նաև, թե ինչպես է Ռուսաստանը փորձել խոչընդոտել ոչ միայն նախկին հարավսլավական հանրապետություն Մակեդոնիայի, այլև Մոնտենեգրոյի անդամակցությանը ՆԱՏՕ-ին։ Մենք այնտեղ ականատեսը եղանք հեղաշրջման անհաջող փորձի», – ասել է Ստոլտենբերգը։

Նրա խոսքով՝ բազմաթիվ են օրինակները, երբ ՌԴ-ն փորձ է արել միջամտել ՆԱՏՕ-ի անդամ կամ գործընկեր երկրների ներքաղաքական գործընթացներին, այդ թվում՝ սոցցանցերի միջոցով։

Ավելի վաղ Ստոլտենբերգը հայտարարել էր, որ Հյուսիսատլանտյան դաշինքը պատրաստ է ընդունել Մակեդոնիան որպես կառույցի 30-րդ անդամ։ Վերջնական որոշումը, սակայն, կկայացվի Մակեդոնիայում՝ երկրի անվանափոխության հետ կապված հանրաքվեի ընթացքում, որը կկազմակերպվի Հունաստանի հետ կնքված համաձայնագրի շրջանակում։

Մակեդոնիայի անվան հետ կապված ավելի քան 25 տարվա վեճը թույլ չէր տալիս երկրին դառնալ Եվրամիության ու ՆԱՏՕ-ի անդամ՝ Հունաստանի ստեղծած խոչընդոտների պատճառով։ Հունաստանը տարիներ շարունակ պահանջում էր փոխել երկրի անունը՝ այն հունական Մակեդոնիա նահանգի հետ չշփոթելու համար։

Загрузка...