PayPal-ը փակել է Անգլիական պաշտպանության լիգայի առաջնորդի հաշիվները՝ նրա խտրական գործունեության պատճառով

80

PayPal վճարային համակարգը հայտարարել է, որ այսուհետեւ չի կատարի Անգլիական պաշտպանության լիգայի նախկին առաջնորդ Թոմի Ռոբինսոնի անունով որեւէ վճարային գործարք, փոխանցում է Sky News-ը:

Անգլիական պաշտպանության լիգան բրիտանական առավելապես երիտասարդական հասարակական կազմակերպություն է, որը հանդես է գալիս իսլամացման դեմ: Այն կազմակերպում է երթեր եւ ցույցեր, հանրային բողոքներ՝ հանդես գալով ընդդեմ նոր մզկիթների կառուցման եւ իր կարծիքով՝ բրիտանացիներին պարտադրվող իսլամական մշակույթի ատրիբուտների եւ շարիաթի օրենքների:

Վճարային համակարգից հայտարարել են, որ իր ծառայությունները չեն կարող օգտագործվել «ատելությանը, բռնությանը կամ խտրական անհանդուրժողականության այլ ձեւերին նպաստելու համար»:

Մարտին Ռոբինսոնի դեմ միջնորդագիրը, որով PayPal-ի տիպի ընկերություններին կոչ էր արվում դադարեցնել նրա անունից վճարային գործարքների կատարումը, հազարավոր մարդիկ էին ստորագրել:

Նշվում է, որ «աջերի» ներկայացուցիչ համարվող Ռոբինսոնը, որը PayPal հարթակն օգտագործում էր իր ակցիաների համար հագանակություն հավաքելու համար, վճարային համակարգի որոշումը «ֆաշիզմ» է անվանել եւ հայտարարել, թե «նրանց դուր չի գալիս իմ կարծիքը, եւ նրանք ցանկանում են ինձ ստիպել լռել»:

PayPal-ն իր հերթին հայտարարել է, որ իրենք մասնավոր դեպքերը չեն մեկնաբանում, սակայն հաշիվները մանրամասն ուսումնասիրել են՝ հավաստիանալու համար, որ դրանք համապատասխանում են ընկերության քաղաքականությանը:

Ավելի վաղ PayPal ընկերությունն արդեն համանման պատճառներով հաշիվներ փակել էր: Օրինակ՝ Պիտսբուրգի սինագոգում հրաձգությունից հետո փակել էր Gab սոցիալական կայքի հաշիվները, որի ծառայություններից օգտվել էր հրաձիգ Ռոբերտ Բոուերսը, իսկ ավելի վաղ էլ՝ «աջերի» լրատվական աղբյուր InfoWars-ի:

Загрузка...