Բացահայտվել է անցած տարի Չեխովի փողոցում կատարված բնակարանային գողությունը

25

2019 թվականի օգոստոսի 7-ին, ժամը 14.30-ին, ոստիկանության Շենգավիթի բաժնում հաղորդում էր ստացվել, որ օգոստոսի 5-ի ժամը 10.30-ից օգոստոսի 7-ի ժամը 10.30-ն ընկած ժամանակահատվածում տեխնիկական միջոցների գործադրմամբ բացել են Չեխովի 33 շենքի բնակարաններից մեկի մուտքի դուռը և գողացել ոսկյա զարդեր և չհրկիզվող պահարան, որի մեջ է եղել տանտիրոջ հորը պատկանող «AR-6» տիպի ատրճանակը։ Գողացել էին նաև տանտիրոջ «Տոյոտա»-ի բանալիները և շենքի բակից փախցրել մեքենան:

ՀՀ ոստիկանության տեղեկատվության եւ հասարակայնության հետ կապերի վարչությունից հայտնում են, որ նույն օրը ոստիկանության Կոտայքի բաժնից հեռախոսագիր էր ստացվել, որ ժամը 09.30-ին նշված ավտոմեքենան, այրված վիճակում, հայտնաբերվել է Կոտայքի մարզի Առինջ գյուղի կամրջի տակ:

Օգոստոսի 7-ին հարուցվել էր քրեական գործ՝ ՀՀ քրեական օրենսգրքի 177-րդ հոդվածի (Գողությունը, որը կատարվել է բնակարան ապօրինի մուտք գործելով) 3-րդ մասի 1-ին 1.1 կետի, 183-րդ հոդվածի (Ավտոմեքենային կամ տրանսպորտային այլ միջոցին ապօրինաբար տիրանալն առանց հափշտակելու նպատակի) 3-րդ մասի 1-ին կետի և 185-րդ հոդվածի (Գույքը դիտավորությամբ ոչնչացնելը կամ վնասելը) 3-րդ մասի 1-ին կետի հատկանիշներով։

Դեպքից ամիսներ անց ոստիկանության Շենգավիթի բաժնի քրեական հետախույզների ձեռնարկած օպերատիվ-հետախուզական միջոցառումների շնորհիվ օպերատիվ տվյալներ են ստացվել, որ նշված բնակարանային գողությունը կատարել և ավտոմեքենան փախցրել են Չեխովի փողոցի 24, 27 և 25 տարեկան երեք բնակիչներ:
Հունվարի 22-ին, ժամը 9-ին, կասկածվող անձինք իրենց բնակության հասցեներից բերման են ենթարկվել ոստիկանության Շենգավիթի բաժին, ներկայացվել նախաքննական մարմնին և ձերբակալվել:

Загрузка...